Weana Schmankerln - Wiener Mundart Poesie
Wiener PoesieDie Bananen
BANANAN
Aum Moakt kummt unlängst zu an Standler
a Mau´, der ausschaut wia a Sandler.
Und außadem siacht ma eam au´n,
dass er ned b´sonders g´scheid sei kau´n.
Mit an klaan Netzerl in da Haund
kummt zuwe er zum Greitlerstaund;
Und wir´a laungsaum her so zottl´t
wirkt er a bissal leicht vertrottl´t,
wia´s oft der Fall is bei so Männan
de wia a Weib mi´n Zegal rennan.
Und wäu des linke Ohr eahm tropft
Hod er´s mit Watte si vaschtopft.
Drum tuat er si zu sein Maleer
jetzt mit´n Hörn a bissal schwer.
Von Haus aus eeh scho leicht beklopft
Und no dazua de Uhrn vaschtopft,
do kummt es, wia es kumma muaß –
zu dem folgenden Dischkurs:
,,Tag der Herr! Wos kriag ma denn?“
,,Lauter red´n, bittescheen!“
,,I frog ihna: wos mechtn´s haum!?“
,,Zwaa Bananen und a Kilo Traub´m!“
,,Traub´m san do – picksiaß – ka Laus,
nur Bananen san scho aus.
Murg´n werd i frische hol´n,
oba sunnst gibt´s olles, wos se woll´n.
Sogn´s hoit, wos se gern häd´n!“
,,Kennan se ned lauter red´n?
B a n a n e n mecht i – scheene zwaa -
Und a Kilo Traub´m aa!“ –
Der Greitler sogt:,,Se san a Gfoahr,
i schrei jo eeh scho wia a Noar!
I hob scho g´sogt mei liaba Herr:
BANANEN hob i kaane mehr.
Nehmans heit hoit Mandarinan,
scheene hob i do herinnan.“
Drauf sogt der Sandler ungehoit´n:
,,De kennans ihna ruhig g´hoit´n,
de Varreckal´n, diese klaanan –
i wü Traub´n und B a n a n a n!“
Jetzt geht der Standla leich in´d Heh´:
,,Jo glaub´n see, i moch an Schmäh,
dass i ka Banane hob?
Herr, se bringan mi ins Grob!
Nehman´s hoit um Gottes Wüll´n
Stott Bananen heit Marüll´n
Oda in Dreiteiflsnauman
Pferscher, Kriachal´n oder Pflauman.
Olles hob i do – schaun´s her:
Ogrosl´n und Heidlbeer;
Äpfl kaunn i ihna zeig´n:
Maschanska, Kronprinz – gaunze Steig´n.
Nur – vaschtehngan´s mi: BANANE
Hob i heite wiaklich KAANE!“
Drauf sogt der Kunde: ,,Se san z´leise!
Wia san de Bananenpreise?
Waunn´s teuer san, so nimm i´s aa,
i wüll jo heite eeh nur zwaa!“
Do pockt den Standler leicht da Zuan:
,,Wos soll i mit dem Trottl tuan?
Liaba Himmevota, hoit mi z´ruck,
das i eam ned ane druck!“
Daunn brüllt er:,,Pleampl – jetzt huach her,
waunn´s jetzt ned kloppt, gschiacht a Maleer!
Host de Uhrn mit Dreck vaschtopft
Oda bist scho gaunz beklopft?
Bei mir is wohl der Kunde Keenig,
doch i siach, des nutzt ma wenig,
trotz Freindlichkeit moch i kaan Riss,
wenn der bled und terrisch is. –
Und jetzt paß auf: zum letzt´n moi: BANANE
hob i ned amoi mehr AANE!!!“ –
Do geht a Leicht´n übers G´sicht vom Sandler
Und vorwurfsvoi sogt er zum Standler:
,,Ah so! Nau jetzt vaschteh i endlich!
Wos redn´s denn ned glei vaschtändlich?
I hob kapiert jetzt, wos se manan;
Oiso loß ma´d Traub´m und gebm´s ma VIER BANANAN!“
Beitrag hier her verschoben, LG, Mod Volvos